«من امتجان کودندرم!»
چئه امتحان کودندری ریفئق؟
مردنه؟
«دیار غربت» شؤن و ونگرسنه؟
چئه امتحان کودندری ریفئق؟
دمرده آسمؤنأجی
خشک̌̌ ارسو وارسنه؟
چئه امتحان کودندری ریفئق؟!
//
أمرأنی ایمروز̌ پسی،
تی جا
امتحان کونیم!
او چئه کی تو
امتحان کودندبی ریفئق!
تو غریبه خاکˇ مئن دری
ألئه
اؤره تی زندگی خوشه.
منأنی
جؤنی خاکˇ مئن
شبنده روز،
می أمأن و تی وگرسنئبه
خؤندگی درم.
دارؤنه کشأگینم، دارؤنˇ همرأ گب زئنم
هیمأ آتشأگینم، آتشˇ همرأ گب زئنم.
ای روزؤن،
خالی هینه می زندگی؛
دارؤنه کشأگینم،
دارؤنˇ همرأ گب زئنم..!
دئه شؤأ بؤدره،بئه سردˇ خیابؤنه دوار
تا فأرسیم کسؤنˇ ور
دوتته یی، یکته ببیم، کشأگیریم کس به کسه
شی بزئه شؤؤنˇ ور..
امه هرته، یکته داریم.
اگه دئه تی دیلˇ مئنه هیمه دننئه،
امه تی هیمه بنیم،
سوجنیم تی پایˇ جیر!